Gwasanaeth Caffael Cydweithredol Ardal

Sefydlwyd Ardal i drawsnewid caffael ar draws pedwar awdurdod lleol yn Ne-ddwyrain Cymru – Caerdydd, Sir Fynwy, Torfaen a Bro Morgannwg. Gan gydnabod cynnydd mewn pwysau deddfwriaethol, prinder gweithlu a mwy o ddisgwyliadau o ran buddion lles cymunedol a datgarboneiddio, roedd partneriaid yn gweld yr angen am wasanaeth ar y cyd sy'n gallu darparu caffael cyson sy'n canolbwyntio ar y dyfodol

Mae Ardal yn dod ag arbenigedd caffael, datblygiad polisi, ac arweinyddiaeth categori ynghyd mewn un model integredig sy’n cael ei gynnal gan Gyngor Caerdydd. Mae hyn yn cynnwys goruchwylio gwariant blynyddol o £1.3bn a rheoli fframweithiau rhanbarthol mawr ym maes adeiladu a gwasanaethau proffesiynol

Drwy gael strategaeth, prosesau a llywodraethiant i gyd-fynd â’i gilydd, mae Ardal yn galluogi'r partneriaid i gyflawni Deddf Llesiant Cenedlaethau'r Dyfodol (Cymru) 2015 a Deddf Partneriaeth Gymdeithasol a Chaffael Cyhoeddus (Cymru) 2023, gan sicrhau bod caffael yn cael ei ddefnyddio i sbarduno gwelliannau amgylcheddol, cymdeithasol ac economaidd

Trwy greu Ardal, cyflwynwyd model gweithredu ar y cyd sydd wedi'i seilio ar lywodraethiant cyffredin, polisïau cyson, a gwneud penderfyniadau tryloyw ar draws y pedwar awdurdod

Mae Tîm Strategaeth a Datblygu pwrpasol yn arwain y gwaith o gysoni polisïau, dadansoddi data, hyfforddi a datblygu technoleg, gan sicrhau bod deddfwriaeth gaffael ac arfer gorau yn cael eu defnyddio’n gyson. Mae offer llywodraethu digidol, dogfennaeth tendro safonol, a Rheolau Gweithdrefn Contract newydd yn cefnogi prosesau symlach, llwybrau archwilio cryfach a gwell gwybodaeth am reoli

Mae Ardal hefyd wedi cyflwyno mentrau arloesol, gan gynnwys: y system THRIVE ar gyfer olrhain ymrwymiadau buddion lles cymunedol; canllaw hinsawdd a lleihau carbon ar y cyd a ddatblygwyd gyda WRAP; a gwaith modelu TOMS gwell ar gyfer prosiectau cydweithredol mawr

Mae byrddau crwn, gweithgorau a thasgluoedd rhanbarthol newydd yn cryfhau ymgysylltiad ymhlith partneriaid, cyflenwyr ac arbenigwyr diwydiant – gan sicrhau bod y gwasanaeth yn parhau i fod yn ystwyth, yn wybodus, a’i fod yn cyd-fynd â blaenoriaethau rhanbarthol a chenedlaethol

Mae model cydweithredol Ardal wedi cael effaith fesuradwy ar awdurdodau partner, ar gyflenwyr ac ar gymunedau lleol. Mae strategaethau caffael unedig a fframweithiau polisi sy’n cyd-fynd â’i gilydd yn sicrhau cysondeb a thegwch, ac mae’r gwelliannau a wnaed i hyfforddiant ac i adnoddau a rennir wedi cynyddu gallu ar draws y rhanbarth

Mae Buddion Lles Cymunedol yn cael eu cyflawni’n gynt, gyda chefnogaeth monitro THRIVE a Bwrdd Buddion Lles Cymunedol newydd, gan arwain at dros £10m mewn ymrwymiadau a chefnogaeth wedi'i dargedu i gymunedau sydd â’r angen mwyaf

Mae'r gwaith datgarboneiddio cydweithredol yn helpu partneriaid i symud tuag at Sero Net erbyn 2030, ac mae’r canllawiau newydd yn lleihau carbon ar draws meysydd gwariant allweddol. Mae’r adroddiadau a geir o ddangosfyrddau PowerBI yn rhoi golwg eglur ar berfformiad, gwariant BBaCh, allyriadau carbon, a chanlyniadau contract i arweinwyr

Gyda'i gilydd, mae'r gwelliannau hyn wedi cryfhau llywodraethiant, gwella gwerth am arian, cynyddu effaith economaidd leol, ac wedi dangos bod Ardal yn fodel blaenllaw o gydweithredu caffael cynaliadwy a graddadwy